A po humb jetën nga kanceri Vladimir Putin?

24 Janar 2023, 08:58, Blog CNA

A po vuan presidenti rus Vladimir Putin nga ndonjë sëmundje e rëndë? Për këtë nuk ka asnjë konfirmim zyrtar apo asgjë të përafërt. Megjithatë, muajt e fundit kanë dalë disa raporte që tregojnë se është kështu.

Në fillim të këtij muaji britanikja “The Daily Mail”, citoi Kirilo Budanov, kreun e Shërbimit Sekret të ushtrisë ukrainase, të deklaronte se Putin tashmë është “i sëmurë me kancer dhe se do të vdesë shumë shpejt”, teksa do ta zëvendësojë një nga miqtë e tij më të besuar.

Budanov nuk dha asnjë provë konkrete për këtë çështje, dhe një pretendim i tillë që vjen nga një zyrtar i lartë i zbulimit nga pala tjetër e luftës duhet të merret logjikisht me rezerva. Por fakt është që ai nuk është raporti i parë i kohëve të fundit në lidhje me gjendjen shëndetësore të Putinit.

Në nëntorin e vitit të kaluar, gazeta tjetër britanike “The Sun” raportoi bazuar tek e-mailet e zbuluara nga një burim i shërbimit sekret rus, se 70-vjeçari Putin vuan nga kanceri i prostatës dhe sëmundja e Parkinsonit. “Unë mund të konfirmoj se ai është diagnostikuar me sëmundjen e Parkinsonit në fazën e hershme, por tashmë ajo po përparon”- tha burimi i brendshëm për gazetën.

“Ky fakt do të mohohet dhe do të tentohet të fshihte me çdo mënyrë. Vladimir Putin merr rregullisht sasi të mëdha steroidesh dhe injeksionesh novatore kundër dhimbjeve, për të ndaluar përhapjen e kancerit në pankreas me të cilin u diagnostikua kohët e fundit”- shtoi ai.

Për më tepër, sipas “The Sun”, ish-kreu i MI6 britanike, Sër Riçard Dearlav, ka deklaruar se udhëheqësi rus “përballet me shtrimin në një sanatorium, ndërsa do të largohet nga pushteti brenda këtij viti”. Përveç kësaj, presidenti rus është parë kohët e fundit me “gjurmë të dyshuara injeksionesh” për shkak të trajtimeve të ndryshme që merr çdo ditë.

“The Sun” citoi ndërkaq analistin politik Valeri Solovej të thoshte se Putin vuan nga një “çrregullim skizoafektiv”, përveç kancerit dhe sëmundjes së Parkinsonit. Por Kremlini ka mohuar çdo lloj pretendimi se Putin vuan nga ndonjë sëmundje.

Një artikull i mëvonshëm i “New York Post” përsëriti pretendimet duke iu referuar shenjave në duart e Putinit, duke vënë gjithashtu në dukje se presidenti rus e ka bërë zakon kohët e fundit të kapet me forcë pas tavolinave.

Po ashtu gazeta pretendoi se kur Kremlini ka publikuar video kohët e fundit, ato kanë qenë të modifikuara për të errësuar pamjen e dorës që dridhet, së bashku me spekulimet se presidenti rus i fsheh duart nga frika se mos helmohet.

Ndërkohë, në dhjetor gazeta ukrainase “Ukrainska Pravda” raportoi duke cituar burime nga shërbimi sekret danez, se presidenti rus “po përjeton dhimbje të forta kronike pas disa rrëzimeve dhe aksidenteve”. Megjithatë, Shërbimi Informativ Ushtarak Danez nuk beson se Putini po vuan nga një sëmundje e pashërueshme, dhe parashikon që ai do të mbetet në pushtet deri në kohën e zgjedhjeve presidenciale të vitit 2024.

Po ashtu, ai raport vinte në dukje se spekulime të tilla mbi Putinin ka pasur edhe më parë, përfshirë pretendimin se ai vuante pasojat e rrëzimit nga kali gjatë fillimit të viteve 2000.

Po “Ukrainska Pravda” botoi vitin e kaluar një raport duke pretenduar se Putini “bën rregullisht banjë me ekstraktin e bririt të drerit”.

Por për shkak se artikulli u botua më 1 prill, mund të ketë qenë një shaka e Ditës së Gënjeshtrave. Budanov tha se shpreson që shëndeti i dobët i Putinit të çojë në përfundimin e shpejtë të luftës në Ukrainë. Por nëse është e vërtetë që Putini është vërtet duke vdekur, atëherë kjo gjendje mund ta bëjë atë të arrijë në përfundimin se nuk ka më asgjë për të humbur. Gazeta “Daily Star” citoi një burim të brendshëm të Kremlinit të thoshte se Putini vuan nga “dobësia fizike, marramendja dhe mungesa e oreksit”, gjë që e ka zhytur atë në një situatë të dëshpëruar ndërsa lufta në front vazhdon.

Lufta ekziston në kokën e një njeriu të sëmurë dhe me një gjendje psikologjike të rënduar, që po përpiqet të marrë sa më shumë njerëz me vete në një “parajsë” mitike. Natyrisht, nuk është aspak një dukuri e rrallë që kundërshtarët e një lideri botëror të pretendojnë se ai është në gjendje të keqe shëndetësore.

Thënë kështu, skenari më i mundshëm është se nuk do të ketë në asnjë moment në të ardhmen e parashikueshme ndonjë transparencë në lidhje me gjendjen shëndetësore reale të Vladimir Putinit .

Përkthyer nga CNA.al