Kush është Princi Hajrih XIII/ Aristokrati që ëndërronte kthimin e Rajhut perandorak në Gjermani

2 Janar 2023, 15:00, Blog CNA

Kush është Princi Hajrih XIII/ Aristokrati që

Ai kishte planifikuar kryerjen e një grushti shteti, dhe madje kishte parashikuar të hynte me forcë në Bundestag, parlamentin gjerman. Princi Hajnrih XIII, nuk është thjesht një “nostalgjik” i Rajhut të dikurshëm, por figura qendrore e një organizate politike ekstremiste dhe subversive të ekstremit të djathtë që aspironte të përmbyste sistemin politik të Gjermanisë.

Që nga mëngjesi i së mërkurës, aristokrati 71-vjeçar, që ndërkohë zotëronte edhe një kështjellë në rajonin e Turingisë, ka përfunduar në pranga së bashku me 25 persona të tjerë pas një operacioni të madh të ndërmarrë nga policia federale gjermane për të shkatërruar një organizatë me tipare të dukshme terroriste.

Por kush është Hajrih XIII?

“Monarkia? Sipas tij u shkatërrua nga financat hebraike. Lufta e Parë Botërore? E shkaktuar nga masoneria e huaj. Adolf Hitleri? U mbështet nga kapitali amerikan”- shkruan gazetari Paolo Valentino në faqet e së përditshmes italiane “Corriere della Sera”.

24 orë pas operacionit blic të Bundespolizeit, kanë rrjedhur informacionet e para mbi udhëheqësit e Reichsbuerger - që në gjermanisht do të thotë “qytetarë të Rajhut” - të cilët ëndërrojnë një rikthim në kohën e perandorisë dhe nuk e njohin autoritetin gjerman.

Qëllimi i këtij grupit ishte kryerja e një grushti shteti. Sipas asaj që u raportua nga korrespondentja e agjencisë italiane të lajmeve “Ansa” në Gjermani, Rosanna Pugliese, Reichsbuerger po përgatitej të qeveriste duke marrë parasysh se “revolucioni aq i dëshiruar mund të përfshinte ndoshta edhe disa të vdekur”.

Dhe Hajnrih XIII ishte “Deus ex machina”, lideri i organizatës kriminale. Sigurisht që për autoritetet federale gjermane kjo nuk ishte diçka e re. Përkundrazi, prej vitesh ekzistenca e kësaj organizate ishte e njohur për Zyrën për Mbrojtjen e Kushtetutës, inteligjencën civile në rajonin e Hesenit.

Hajrih ishte shumë aktiv. Ai organizonte takime me njerëz që ndanin të njëjtat ide dhe mendime, dhe ëndërronte për fillimin e kryengritjes së ardhshme. Rreth 1 vit më parë ai kishte kaluar nga teoria në fakte. Ose të paktën, ky do të kishte qenë qëllimi nëse autoritetet federale gjermane nuk do ta kishin gjurmuar dhe ndërhyrë në kohë.

Operacioni i madh

Në operacionin e madh policor përfunduan në pranga 25 persona. Mes të arrestuarve janë 3 profile, ata që dallohen nga të tjerët: ai i Hajnrih XIII, një ish-deputet i ekstremit të djathtë që punon ende sot si gjyqtar në Berlin, si dhe shoqëruesi i aristokratit 71-vjeçar, njëherazi ish-ushtar i njësisë speciale të ushtrisë gjermane, Bundeswehr.

Sipas asaj që raportoi Prokurori i Përgjithshëm, një karakteristikë e përbashkët e të arrestuarve “është refuzimi i institucioneve shtetërore, dhe fiksimi pas miteve që rrjedhin nga teoritë e konspiracionit, ata janë ithtarë të ideologjisë së Rajhut dhe QAnon”.

Në operacionin e zhvilluar në orët e para të mëngjesit të së mërkurës në 11 rajone të Republikës Federale, u angazhuan 3000 policë. Dy arrestime u bënë edhe jashtë vendit: një në Austri dhe tjetri në Itali, në Peruxha, ku u kap një ish-oficer i njësive speciale.

Përkthyer nga CNA.al